童言

放工的時候，在擠迫得喘不過氣的巴士內，聽到一段有趣的對話...

女兒：媽媽，點解啲嘢咁貴架？
媽媽：係呀係呀，好貴架...
女兒：咁我第時大個一定要讀大學，賺多啲錢
媽媽：係呀？咁你記得要讀大學喇喎..

(我心想，人細鬼大，又會咁現實既，不過呀媽應該好安慰，點知呀女接住話...)

女兒：不過到時你都老喇，你到時係咪會死架？
(我忍唔住偷笑....)
媽媽：(也忍不住笑了..)係架，到時媽媽會死架，咁你想唔想媽媽死呀？
女兒：唔想呀

(對話到此，都算幾溫馨，點知係呢個時候，個呀媽竟然做了以下總結....)

媽媽：咁你到時賺好多錢，記住俾晒媽媽洗喇！
女兒：好丫，我俾啲錢你洗，你唔好死丫。
媽媽：係喇，啱喇！

果然係有其母必有其女，疲倦的我，因她們無心的天真對話，所有沉鬱的心情都掃清光。
生活可以選擇注目悲慘，執迷地埋怨，但更可以放眼周圍，找尋小小的樂趣。
有時候，就在不留神處，帶給你很大的動力，還有為軟弱的身心打氣的力量！